• மலேசியா பினாங்குத் தமிழ் எழுத்தாளர் சங்கத்துக்கு நிரந்தர மையம் அவசியம் — நிலம் ஒதுக்கிட மாநில அரசிடம் கோரிக்கை
• Share On:
• ramani on 2025-11-04 19:38:44

பிறை, நவ.4 -தமிழ் இலக்கியத்தின் ஒளிவிளக்காகப் பினாங்கில் கடந்த 65 பணியாற்றி வரும் பினாங்குத் தமிழ் எழுத்தாளர் சங்கம், தன்னுடைய இலக்கியப் பணிகளை மேலும் விரிவுபடுத்தவும், இளம் தலைமுறைக்கு இலக்கியப் பயிற்சி அளிக்கவும் ஒரு நிரந்தர பணிமனை தேவையென மாநில அரசாங்கத்திடம் கோரிக்கை விடுத்துள்ளது.

தமிழ் இலக்கியத்தைத் தழுவி வளர்த்துவரும் இச்சங்கம், 1960ஆம் ஆண்டு தொடங்கப்பட்டது. கடந்த 65 ஆண்டுகளாகப் பல தலைமுறை எழுத்தாளர்களையும் கவிஞர்களையும் உருவாக்கி, பினாங்கின் தமிழ் சமூகத்தில் பண்பாட்டு விழிப்புணர்வை விதைத்துள்ளது. சங்கம் தொடங்கியதிலிருந்து இதுவரை ஐந்து முதலமைச்சர்களின் காலத்திலும் அரசியல் சார்பின்றி இலக்கியத்தையே தன் உயிராகக் கொண்டு பணியாற்றி வருகிறது.

இலக்கிய மையம் வேண்டும் — செ. குணாளன் வலியுறுத்தல்

சமீபத்தில் நடைபெற்ற பினாங்குத் தமிழ் எழுத்தாளர் சங்கத்தின் விருந்தோம்பல் நிகழ்ச்சியில் புதியத் தலைவராகத் தேர்வு செய்யப்பட்ட செ. குணாளன், மாநில ஆட்சிக்குழு உறுப்பினர் டத்தோஸ்ரீ சுந்தராஜு சோமுவிடம் சங்கத்திற்கென நிலம் ஒதுக்கிடுமாறு கோரிக்கை வைத்தார்.

அவர் உரையாற்றியபோது கூறியதாவது:

“பினாங்குத் தமிழ் எழுத்தாளர் சங்கம் தமிழ் மொழி மற்றும் இலக்கியத்தின் மரபைப் பாதுகாக்க அரை நூற்றாண்டுக்கும் மேலாக பணியாற்றி வருகிறது. தற்போது எங்களுக்கென ஒரு நிரந்தர மையம் இருந்தால், இலக்கிய நிகழ்ச்சிகள், கருத்தரங்குகள், எழுத்தாளர் பயிற்சிகள், நூல் வெளியீடுகள் போன்றவை மேலும் திட்டமிட்ட முறையில் நடைபெறும். ஒரு நிலம் மட்டும் கிடைத்தால் போதும்; கட்டிடத்திற்கான நிதியை நாங்களே திரட்டி அமைத்துக்கொள்வோம்,” என அவர் தெரிவித்தார்.

‘உங்கள் கோரிக்கை பரிசீலிக்கப்படும்’ — டத்தோஸ்ரீ சுந்தராஜு சோமு உறுதி

இக்கோரிக்கைக்கு பதிலளித்த டத்தோஸ்ரீ சுந்தராஜு சோமு அவர்கள், “இது மிகச் சரியான நேரத்தில் முன்வைக்கப்பட்ட கோரிக்கை. பினாங்கின் தமிழ் இலக்கிய வரலாற்றில் இச்சங்கம் முக்கிய பங்கு வகிக்கிறது. உங்கள் கோரிக்கையை மாநில அரசிடம் சமர்ப்பித்து பரிசீலிக்க ஏற்பாடுகள் செய்யப்படும். அதற்காக ஒரு முறையான கடிதத்தை தயார் செய்து அளிக்கவும்,” என்று உறுதியளித்தார்.

பாராட்டு விழா – எழுத்தாளர்கள், கவிஞர்கள் கலந்து சிறப்பித்தனர்

இந்நிகழ்ச்சியில் பினாங்குத் தமிழ் எழுத்தாளர் சங்கத்தின் புதியத் தலைவராகத் தேர்வு செய்யப்பட்ட செ. குணாளனுக்கு பாராட்டு நிகழ்ச்சி நடைபெற்றது. அந்த நிகழ்வில் பினாங்கு குற்றத் தடுப்பு அறவாரிய துணைத்தலைவர் டத்தோஸ்ரீ புலவேந்திரன், பினாங்கு இந்திய வர்த்தக சங்க உதவித்தலைவர் டத்தோ மரியதாஸ் கோபால், டத்தோ தேவேந்திரன், நிகழ்ச்சி ஏற்பாட்டுக்குழுத் தலைவர் மா. முனியாண்டி, திரு. இராஜமுனி, மேஜர் அட்னன், டத்தி ஹஜி ஹபீப் உள்ளிட்ட பலரும் கலந்து கொண்டனர்.

நிகழ்ச்சியில் உரையாற்றிய டத்தோஸ்ரீ சுந்தராஜு சோமு அவர்கள், “எழுத்தாளர்கள் சமூகத்தின் விழிகள். அவர்களின் எழுத்துகளால் புதிய சிந்தனைகள், நல்ல மாற்றங்கள் உருவாகின்றன. இளம் தலைமுறையை ஊக்குவிக்கவும், நேர்வழிப்படுத்தவும் எழுத்தாளர்கள் மிகப் பெரிய பங்கு வகிக்கிறார்கள். பினாங்குத் தமிழ் எழுத்தாளர் சங்கம் அந்த பணியை சிறப்பாக செய்து வருகிறது,” என பாராட்டினார்.

பினாங்கின் இலக்கியம் வளர்த்த மையம் பினாங்குத் தமிழ் எழுத்தாளர் சங்கம், கடந்த பல ஆண்டுகளாக “தமிழ் இலக்கியம் பினாங்கில் நின்று வளரட்டும்” என்ற கோட்பாட்டில் செயல்பட்டு வருகிறது. சங்கம் பல்வேறு கவிதை வாசிப்பு நிகழ்ச்சிகள், எழுத்தாளர் சந்திப்புகள், புத்தக வெளியீடுகள், மாணவர்களுக்கான போட்டிகள், இலக்கிய கருத்தரங்குகள் போன்றவற்றை தொடர்ந்து நடத்தி வருகிறது.

இப்போது சங்கத்திற்கென ஒரு நிரந்தர மையம் அமைந்தால், அது பினாங்கின் தமிழ் இலக்கிய மையமாக திகழும் என்று எதிர்பார்க்கப்படுகிறது. அங்கு எதிர்காலத்தில் தமிழ் நூலகம், இளம் எழுத்தாளர் பயிற்சி மையம், இலக்கிய காப்பகங்கள், பண்பாட்டு நிகழ்ச்சிகள் நடைபெறும் அரங்கம் ஆகியவை உருவாக்கும் கனவையும் சங்கம் பகிர்ந்துள்ளது.

நிகழ்ச்சி இனிய நட்புணர்வோடு நிறைவடைந்தது

நிகழ்ச்சி இனிய நட்புணர்வோடு, இலக்கிய பாசமும் பண்பாட்டுத் தொணியுமுடன் நிறைவடைந்தது. பினாங்குத் தமிழ் எழுத்தாளர் சங்கத்தின் கோரிக்கைக்கு மாநில அரசு விரைவில் நல்ல பதில் தரும் என இலக்கிய வட்டாரங்கள் நம்பிக்கை தெரிவித்துள்ளன.