• மலேசியா முதியோர்கள் சமூகத்தின் தூண்கள் – பினாங்கு கோ. சாரங்கபாணி மன்றம் ஏற்பாடு செய்த விழா எடுத்துக்காட்டாக அமைந்தது
• Share On:
• prabhakaran on 2025-10-27 15:29:11

முதியோர்கள் பாரம் அல்ல, பாராட்டாகக் காணப்பட வேண்டும் என்ற உன்னதக் கருத்தை மையமாகக் கொண்டு, பினாங்கு மாநில தமிழவேள் கோ. சாரங்கபாணி மன்றம் ஏற்பாடு செய்த மூத்த குடிமக்கள் தின விழா பட்டர்வொர்த் டிஜிட்டல் நூலக அரங்கில் சிறப்பாக நடைபெற்றது. இந்த விழா, சமூக ஒற்றுமையையும் தலைமுறை இடையேயான மரியாதையையும் வலுப்படுத்தும் நிகழ்வாக அமைந்தது.

அரசியல், சமூகத் தலைவர்கள் பங்கேற்பு

பாகான் நாடாளுமன்ற உறுப்பினர் லிம் குவான் எங்கின் நிகராளி தான் கொன் சோங், பாகான் டாலாம் சட்டமன்ற உறுப்பினர் குமரன் கிருஷ்ணன், பாகான் ஜெர்மால் சட்டமன்ற உறுப்பினர் சீ ஈயே கீன், செபராங் பிறை மாநகர் மன்ற உறுப்பினர் லிங்கேஸ்வரன் சர்மா உள்ளிட்ட பல அரசியல், சமூக மற்றும் அமைப்புப் பிரமுகர்கள் விழாவில் கலந்து கொண்டு மூத்த குடிமக்களுக்கு மரியாதை செலுத்தினர்.

மன்றத் தலைவர் மு. நாராயணசாமி தலைமையில் நடைபெற்ற விழாவில், ஒருங்கிணைப்பாளர்களாக ஜே. எம். புருசோத்தமன், செல்வராஜு, மூர்த்தி, சிவராமன், நாகராஜன், மா. நியாண்டி ஆகியோர் பணியாற்றினர்.

“முதியோர்களை குடும்பத்தின் செல்வமாகக் காண வேண்டும்” – குமரன் கிருஷ்ணன்

பாகான் டாலாம் சட்டமன்ற உறுப்பினர் குமரன் கிருஷ்ணன் தனது உரையில், முதியோர்கள் உலகெங்கிலும் மதிக்கப்படுகிறார்கள். நம் சமூகமும் அவர்களின் அனுபவத்தையும் பங்களிப்பையும் மதிக்க வேண்டும். முதியோர்களை பாரமாகக் காணாமல், குடும்பத்தின் செல்வமாகக் கருதி பாதுகாக்கும் பண்பாட்டை வளர்க்க வேண்டும் என்று வலியுறுத்தினார்.

அவர் மேலும், ஒவ்வொரு குடியிருப்பிலும் தினசரி உடற்பயிற்சி முகாம்கள் நடத்தப்படுவது அவசியம்; இது அவர்களின் உடல் மற்றும் மனநலத்தை மேம்படுத்தும். நமது இந்தியர் மக்கள் தொகை 6.6 சதவீதமாக குறைந்து வருவது கவலைக்குரியது. இதை திருத்த சமூக விழிப்புணர்வு தேவை என்றார்.

அத்துடன், மூத்த குடிமக்கள் தினம் போன்ற நிகழ்வுகள் சமூக ஒற்றுமை மற்றும் தலைமுறை இணைப்பை வலுப்படுத்தும் என்பதால், இதை ஆண்டுதோறும் பெரிய அளவில் கொண்டாட வேண்டும் என்றும் தெரிவித்தார்.

“முதியோர்களுக்கு சேவை வரி விதிக்கக்கூடாது” – மு. நாராயணசாமி

மன்றத் தலைவர் மு. நாராயணசாமி தனது உரையில், முதியோர்கள் தங்கள் வாழ்நாள் முழுதும் சமூகத்திற்கும் நாட்டிற்கும் உழைத்தவர்கள். அவர்களுக்கு எஸ்எஸ்டி (SST) அல்லது சேவை வரி விதிப்பது தவறு. அவர்கள் பங்களிப்பை மதிக்கும் வகையில் அரசு சிறப்பு சலுகைகள் வழங்க வேண்டும் என்று வலியுறுத்தினார்.

மேலும், அரசு அமைப்புகள் மூலமாக மூத்த குடிமக்கள் நலத்திட்டங்களை விரிவுபடுத்த வேண்டும் என்றும் கோரிக்கை விடுத்தார்.

பொது மக்களுக்கான யூ.டி.சி மையம் பயனுள்ளதாகும்

தொடர்ந்து குமரன் கிருஷ்ணன் தெரிவித்ததாவது, பாகான் டாலாம் தொகுதியில் இயங்கும் யூ.டி.சி (Urban Transformation Centre) மையத்தில் ஒன்பது அரசாங்கத்துறைகள் தற்போது சேவையில் உள்ளன. பொதுமக்கள் தங்கள் தேவைகளுக்கேற்ப இச்சேவைகளைப் பயன்படுத்தி நலனடைந்திட வேண்டும் என்றார்.

மூத்த குடிமக்களின் உற்சாக பங்கேற்பு

இந்த விழாவில் நூறு பேருக்கும் மேற்பட்ட மூத்த குடிமக்கள் உற்சாகமாக கலந்து கொண்டனர். விருந்தினர்களுக்கு மாலை அணிவித்து, நினைவுச் சின்னம் வழங்கி மன்றம் அவர்களை கௌரவித்தது. சமூக ஒற்றுமையை வலுப்படுத்தும் வகையில் நடைபெற்ற இந்த விழா, பினாங்கு சமூகத்தில் நல்ல எதிரொலியை ஏற்படுத்தியது.

முதியோர்களின் அனுபவம், அறிவு, பொறுமை ஆகியவை சமூகத்தின் அரிய செல்வம் என்பதைக் கண்கூடாக எடுத்துக் காட்டிய இந்த விழா, பினாங்கு கோ. சாரங்கபாணி மன்றத்தின் சமூகப் பொறுப்புணர்வையும், தலைமுறை இணைப்பையும் பிரதிபலிக்கும் சிறந்த நிகழ்வாக அமைந்தது.