• மலேசியா உலக அமைதிக்கும் இந்தியர் பொருளாதார மேம்பாட்டிற்கும் பிரதமர் அன்வர் தலைமை ஏற்க வேண்டும் - டத்தோ பி.குணசேகரன் அறைகூவல்!
• Share On:
• ramani on 2026-04-20 10:19:56

அகல்யா

​செபராங் ஜெயா, ஏப் 20 - சர்வதேச அரங்கில் நிலவும் அமெரிக்கா - ஈரான் இடையிலான பதற்றத்தைத் தணிக்க மலேசியப் பிரதமர் டத்தோஸ்ரீ அன்வர் இப்ராகிம் தனது ராஜதந்திர வலிமையைப் பயன்படுத்த வேண்டும் என்றும், அதே வேளையில் உள்நாட்டில் இந்தியர்களுக்காக ஒதுக்கப்பட்டுள்ள பொருளாதார வாய்ப்புகளைச் சமுதாயம் முழுமையாகப் பயன்படுத்திக் கொள்ள வேண்டும் என்றும் நெகிரி செம்பிலான், செரம்பான் ஜெயா சட்டமன்ற உறுப்பினர் டத்தோ பி.குணசேகரன் வலியுறுத்தியுள்ளார்.

​அண்மையில் நெகிரி செம்பிலான் மாநில ஆட்சியாளர் துவாங்கு முஹ்ரிஸ் இப்னி அல்மருஹ்ம் துவாங்கு முனாவீர் அவர்களிடமிருந்து 'டத்தோ' விருது பெற்ற பி.குணசேகரனுக்குப் பாராட்டுத் தெரிவிக்கும் சிறப்பு நிகழ்வு செபராங் ஜெயாவில் நடைபெற்றது.

பினாங்கு மாநில உரிமைக் குரல் இயக்கத்தின் தலைவர் க.இராமன் தலைமையில் நடைபெற்ற இக்கலந்துரையாடலில் நூற்றுக்கும் மேற்பட்ட அரசு சாரா இயக்கங்களின் (NGO) பிரதிநிதிகள் திரளாகக் கலந்துகொண்டனர்.

*உலகளாவிய அமைதி மற்றும் பிரதமரின் ராஜதந்திரம் ஏன் அவசியம்?

​நிகழ்வில் உரையாற்றிய டத்தோ பி.குணசேகரன், உலக அமைதிக்கும் பொருளாதார நிலைத்தன்மைக்கும் மலேசியா ஆற்றி வரும் பங்கினைச் சுட்டிக்காட்டினார்.

​வரலாற்றுச் சான்று என்றால்  கடந்த காலங்களில் தாய்லாந்து மற்றும் வியட்நாம் இடையிலான எல்லை மோதல்களையும் கருத்து வேறுபாடுகளையும் பேச்சுவார்த்தை மூலம் சுமூகமாகத் தீர்ப்பதில் பிரதமர் அன்வர் இப்ராகிம் ஆற்றிய ஆக்கப்பூர்வமான பங்கினை அவர் நினைவுகூர்ந்தார்.

​மத்திய கிழக்கு பதற்றம் குறித்து அவர் விவரிக்கையில்  தற்போதைய அமெரிக்கா - ஈரான் மோதலால் உலகச் சந்தையில் கச்சா எண்ணெய் விலை விண்ணைத் தொட்டுள்ளது. இது மலேசியா போன்ற நாடுகளின் எரிபொருள் விலையில் (டீசல் மற்றும் பெட்ரோல்) நேரடித் தாக்கத்தை ஏற்படுத்தி, அத்தியாவசியப் பொருட்களின் விலையேற்றத்திற்கு வித்திடுகிறது.

​பொருளாதாரத் தீர்வு 

உலகத் தலைவர்கள் மத்தியில் தனித்துவமான செல்வாக்கைக் கொண்டுள்ள பிரதமர் அன்வர், இந்த விவகாரத்தில் சமாதானத் தூதுவராகக் களமிறங்க வேண்டும். போர்ச் சூழல் நீங்கினால் மட்டுமே சாமானிய மக்கள் விலைவாசி உயர்விலிருந்து விடுபட்டு நிம்மதி அடைய முடியும் என அவர் விளக்கினார்.

​இந்தியர் பொருளாதார வளர்ச்சி 220 மில்லியன் ரிங்கிட் வாய்ப்பு

​இக்கூட்டத்தில் இந்தியர்களின் பொருளாதார மேம்பாடு குறித்து மிக விரிவான ஆலோசனைகள் முன்வைக்கப்பட்டன. மலாக்கா மாநில முன்னாள் ஆட்சிக்குழு உறுப்பினர் சாமிநாதன் இது குறித்துப் பேசுகையில்,

கூட்டுறவுத் துறை அமைச்சரும் கூட்டுறவுத் துறைக்குப் பொறுப்பு வகிப்பவருமான மாண்புமிகு ஸ்டீவன் சிம், இந்தியத் தொழில்முனைவோருக்காக முன்னெடுத்து வரும் திட்டங்களைப் பாராட்டினார்.

​கூட்டுறவு மற்றும் செக்குன் (TEKUN): மலேசியக் கூட்டுறவு ஆணையம் மற்றும் \'செக்குன்\' நிதியம் வழியாக இந்தியச் சமுதாயத்திற்காக 220 மில்லியன் ரிங்கிட் நிதி ஒதுக்கீடு செய்யப்பட்டுள்ளது.

​சிறிய மற்றும் நடுத்தரத் தொழில் செய்யும் இந்தியர்கள் இந்த வாய்ப்புகளைப் பயன்படுத்தி, வெறும் நுகர்வோராக மட்டுமே இருக்காமல், நாட்டின் பொருளாதாரத்தில் முக்கியப் பங்குதாரர்களாக உயர வேண்டும் என்று கேட்டுக்கொள்ளப்பட்டது.

​

சமூக விழிப்புணர்வும் ஆதரவும்

​பினாங்கு இந்தியர்களுக்கான அரசியல் மற்றும் பொருளாதார விழிப்புணர்வை மையமாக வைத்து நடைபெற்ற இந்நிகழ்ச்சியில், டாக்டர் சின்னையா மற்றும் ஜோபினா நாயுடு ஆகியோர் சிறப்பு விருந்தினர்களாகக் கலந்துகொண்டு சிறப்பித்தனர்.

​நிகழ்வின் நிறைவாக, பினாங்கு மாநில உரிமைக்குரல் இயக்கத்தின் தலைவர் க.இராமன் பேசுகையில், டத்தோ பி.குணசேகரன் அவர்கள் நெகிரி செம்பிலான் அரசியலில் பல போராட்டங்களை முன்னெடுத்தவர், சிறந்த தமிழ் உணர்வாளர். அவரைப் பாராட்டுவதில் பெருமை கொள்கிறோம்  என்று புகழாரம் சூட்டி கௌரவித்தார்.

​பினாங்கு மாநிலத்தைச் சேர்ந்த 10-க்கும் மேற்பட்ட முக்கிய அரசு சாரா இயக்கங்கள் இக்கூட்டத்திற்குத் தங்களது முழுமையான ஆதரவை வழங்கின. பிரதமர் அன்வர் இப்ராகிம் இந்தச் சர்வதேசச் சிக்கலில் தலையிட்டால், அது உலக வரலாற்றில் மலேசியாவின் மதிப்பைப் பலமடங்கு உயர்த்தும் என்று கூட்டத்தில் ஒருமனதாகத் தீர்மானிக்கப்பட்டது.-Alaiolinews